Caldas de Reis é unha das vilas con máis sona en empanar a lamprea, xunto con Padrón, onde a denominan timbal. Tamén a preparan con agarimo en Catoira.

A lamprea é un peixe mítico con historia e moitas lendas. Apicio faciaas levar ata Roma por mar, remolcadas en cestas de vimbio. Rabelais nacera e criárase na taberna La Lamproie e Le Procope, o máis antigo café-restaurante de París, posiblemente do mundo, tivo o peixe na súa carta máis de tres séculos. Din que Henrique I, rei dos ingleses, morreu dunha enchente de lamprea. 

Os monxes bieitos de Sahagún de Campos, no camiño de Santiago, aproveitaron as lagoas salgadas de Manganeses de la Lampreana, entre Zamora e Villalpando, para criar lampreas do río, por mor de aliviar as vixilias da Coresma. 

Á lamprea chámalle Cunqueiro "a nai da gota". Cando canta o cuco, corren as choivas de abril e as lampreas son de baixada, desovadas, perden gran parte da súa exquisitez. Carece de escamas e espiñas e conserva unha textura viscosa. Proporciona fermosos soños segundo indica o doutor Fausto Galdo no seu Abecedario das mantenzas.