Ademáis concorrerán en Perlío (Fene) máis de 30 propostas de podcast que están a producirse en Galicia. Todo tipo de temáticas caben neste xa non tan novo modelo de comunicación que está a triunfar nos novos consumos radiofónicos e audiovisuais.

Durante dous días, o venres 12 e o sábado 13 de xuño, o Festival de Podcast posto en marcha o pasado ano por Emisoras Municipais Galegas, será o escaparte da produción de podcast de Galicia. Nunha mañá, a do venres 12, na que o protagonismo o terán as posibilidades didácticas do formato, na que asistiremos á gravación en directo do podcast que o Colexio Centieiras de Perlío emite en Radio Fene mensualmente, os participantes poderán participar en diversos obradoiros de radio impartidos por Actual Comunicación e polo coñecido actor de Talia Teatro e comunicador Toño Casais.

A tarde dará protagonismo e visibilidade ao uso da lingua nas redes sociais e nos novos medios será un dos elementos a debate nunha mesa que dará cabida a radios comunitarias como Cuac FM, Radio Filispim, representación do novo Fediverso como Mastodon.gal ou Obradoiro dixital galego, unha reflexión colectiva especialmente importante nun momento no que o uso da lingua na comunicación está en niveis mínimos de utilización.  

O Festival ofrecerá tamén espazo ao concurso de podcast que patrocina Deleite e no que participan máis de 30 podcast de moi diferenciados estilos, facendo boa a afirmación de que o formato permite todo tipo de contido. Os resultados coñeceranse o sábado 13 no peche do Festival e contará con máis de 15 premios en diferente modalidades, incluíndo o premio acadado pola votación popular que pode realizarse a través do perfil de mastodon.gal das Emisoras Municipais Galegas

Dous días de podcast, radio, coloquio e coñecemento de propostas de todo tipo durante o II Festival de Podcast que EMUGA desenvolverá, co apoio do Concello de Fene e a Deputación da Coruña, os vindeiros 12 e 13 de xuño nas instalacións do Círculo Cultural, Deportivo e Recreativo de Perlío, en Fene.