Multiplícanse nos últimos tempos os programas que exhiben os altibaixos emocionais das embarazadas adolescentes, xa sexa con propósito documental, educativo ou de rir por non chorar. Cómpre ver esta noite se Cuatro evita a vía do escarnio que se desliza por shows como os da MTV, nos que máis que nais adolescentes vemos concursantes de “Humor Amarillo” participando naquela proba que consistía en atravesar á carreira unha porta a escoller entre tres, orando para que fose de papel e non deixar os dentes no camiño: as rapazas do Medio Oeste americano que alí asoman exhiben un rosario de malas decisións, como se fosen deixando a crisma en todas as portas macizas postas no seu camiño. 

Dende aquí, para a reportaxe “Madre a los 16” que se emite en “Conexión Samanta” quince minutos despois da medianoite, tan só unha petición: fuxamos do obvio e non escoitemos unha vez máis a Sergio Dalma cantar con voz ronca como o predictor se pinta de rosa no cuarto de baño.