Amoebo nace en 2022 como un proxecto persoal de Aarón Valle pero moi pronto foi quen de implicar a David Fernández, “un produtor fabuloso” compañeiro de estudios e cómplice musical dende que se coñeceron. Gloria Campello sumouse ao proxecto e iniciaron unha andaina con Aarón como frontman, cantante, músico, e entusiástico bailarín, David Fernández como músico e, sobre todo, produtor e con Gloria Campello asumindo a responsabilidade de audiovisuais do proxecto. Aarón Valle, motor e cara visible de Amoebo acompáñanos neste episodio de Sons de Nós. 

Amoebo lanzaron o seu primeiro sinxelo, “Primeiro pase”, no mes de abril de 2022, dando as primeiras pistas do que sería seu enérxico directo e, semella que este 2025 será o seu ano, porque teñen xa preparado un novo traballo discográfico que verá a luz neste mes de marzo e uns espectáculos en directo, aos que teñen sumado un grupo de 4 bailarinas, nos que prometen cumprir coa súa premisa básica que é facernos bailar e que, segundo os compoñentes de Amoebo, “é inmellorable”.

Aarón preséntanos este novo traballo que xa está preparado para saír, ESCÁNDALO NO ESCURO; un traballo que terá dúas caras moi diferenciadas en resposta a dúas propostas distintas que respostan ás personalidades dos músicos que forman parte de Amoebo, pero que se conxugan á perfección. 

Na cara A predominan os ritmos máis urbanos, mesturados co pop dos 2000, tomando

como referentes a divas como Madonna, Britney Spears, Dua Lipa ou Bad Gyal. E na cara B aparecerá a pegada do pasado “metaleiro” dos artistas: as guitarras e os baixos érguense como protagonistas absolutos, cun fondo urbano e actual, para conformar unha mestura enérxica, agresiva e, sobre todo, festiva.

Fotografía: @leolopezfoto