Un total de 28 alumnos e alumnas de diferentes centros educativos do Concello de Fene iniciaron onte á tarde os cursos de intelixencia emocional organizados pola Concellería de Ensino. Nos obradoiros favorecerase o desenvolvemento de habilidades de intelixencia emocional nunha contorna lúdica, descubrindo as emocións propias e como xestionalas, potenciando a autoestima e aprendendo habelencias sociais.

O curso consta de sete sesións a realizar na Aula de Cultura do Concello entre os meses de novembro e febreiro, e nel participan nenos e rapaces de entre 4 e 15 anos. Impárteo a psicóloga e coach Fátima García, así como a facilitadora María Cayón. Inclúe tamén unha charla coas familias dos nenos e nenas participantes.

A concelleira de Ensino, Ana Novo, acudiu á primeira sesión e valorou moi positivamente a demanda rexistrada, que obrigou a ampliar o número de prazas ofertadas inicialmente e tamén a crear dous grupos en función das idades.