A alta cifra de participación e colaboración veciñal facendo uso dun servizo que busca, primordialmente, “evitar o vertido incontrolado de escombros e residuos voluminosos como mobles ou electrodomésticos”, foi un dos datos máis significativos apuntados polo Concelleiro de Medio Ambiente, Leonardo Bermúdez, quen amosou ademais a súa satisfacción por poder “ofrecer unha cifra tan importante de usuarios, o que vén indicar que os veciños e veciñas de Arzúa se van concienciando da necesidade de contribuír entre todos ao coidado do , ben sexa a través da recuperación de materiais que poden ser reciclados como é o caso do papel, o vidro ou o metal, ou mediante a separación dos residuos xerados nos fogares que representan un risco para o medio ambiente, caso dos medicamentos, pilas, pinturas e moitos outros”.
O punto limpo de Arzúa, situado na Rúa dos Carpinteiros do Parque Empresarial, está dotado de contedores específicos para diversos tipos de materiais de desfeito susceptibles de entrar nos circuítos de reutilización e reciclaxe, co obxecto fundamental de servir aos cidadáns como centro de achega voluntaria e como complemento da recollida selectiva dos residuos producidos no ámbito domiciliario. Por iso, se ben durante este período de tempo os cidadáns foron depositando no recinto residuos de todo tipo, destacan pola súa cantidade, e segundo os datos facilitados dende o departamento de Medio Ambiente, os materiais referidos a voluminosos, que engloba, por exemplo, os colchóns ou os mobles. Tamén é salientable a grande cantidade achegada de materiais electrónicos, de plásticos ou mesmo de ferralla. Aínda que en menor cantidade, tamén son salientables as achegas depositadas de madeira e escombro, e en menor cantidade as de podas.
A parte destes materiais, ao Punto Limpo tamén se poden achegar outro tipo de escombros que polo seu tamaño ou nivel de contaminación non poidan ser depositados nos recolectores da rúa; quedan excluídos, sen embargo, a materia orgánica e os residuos radioactivos.
O recinto está aberto, en horario de atención ao público, os luns, mércores e venres entre as 10 e as 14 horas e os sábados entre as 10 e as 18 horas.
Leonardo Bermúdez, edil responsable de medio ambiente, quixo agradecer publicamente a colaboración veciñal con esta iniciativa e agarda “ que a contribución á mellora do medio vaia medrando paseniñamente mediante proxectos de características e con propósitos similares a este que puxemos en marcha en Arzúa hai pouco máis de medio ano”.
