O delegado do Goberno en Galicia, Pedro Blanco, destacou esta mañá que “a humanización da avenida de As Pías simboliza o compromiso do Goberno coa transformación urbana e social de Ferrol”. Fíxoo durante a inauguración do último tramo das obras, unha actuación executada polo Ministerio de Transportes cun investimento de 11,5 millóns de euros do Plan de Recuperación.

“O Goberno de España conta con Ferrol” destacou o delegado quen salientou que esta obra “conecta barrios, persoas e oportunidades”. Durante o acto, recoñeceu os desafíos técnicos que se tiveron que superar e recalcou que “cando hai vontade, coordinación e compromiso, os resultados chegan. Hoxe xa é unha realidade: ao servizo da xente”. Estivo acompañado polo alcalde, José Manuel Rey; o presidente da Deputación da Coruña, Valentín García; a subdelegada na provincia, María Rivas, e a delegada da Xunta, Martina Aneiros.
“É o inicio do Ferrol que queremos construír da man dos ferroláns”, explicou o delegado, tras lembrar que o Goberno destinou máis de 5.000M€ “converténdoa na cidade con maior investimento de Galicia”. Neste senso, fixo fincapé en que “o Goberno de Pedro Sánchez chega a cada recuncho de Galicia”, nas cidades e os barrios, nas pequenas cousas e nos grandes proxectos como As Pías. Así mesmo, apuxo en valor o traballo do Concello de Ferrol, da Subdelegación do Goberno na provincia e o persoal da Demarcación de Estradas, así como a paciencia e comprensión dos veciños e veciñas durante o desenvolvemento dos traballos.

O Ministerio de Transportes e Mobilidade Sostible completou hoxe, coa posta en servizo do último tramo previsto, as obras de mellora da mobilidade na Avenida das Pías (FE-14) principal via de comunicación entre Ferrol e Fene. Transformaron a configuración desta estrada para adaptala ao tránsito de peóns e bicis, calmar o tráfico rodado e limitar o impacto da vía nas zonas residenciais lindeiras. En total, investíronse 11,5 millóns de euros (IVE incluído).