“Bodegas Barral naceu en Betanzos das mans dos meus avós. Antigamente eramos produtores porque tiñamos viñedos en Betanzos e se traía viño da Mancha, se elaboraba e vendía. Hoxe en día xa somos unha distribuidora. Eu son a terceira xeración na que vendemos produtos xa elaborados”, explica Manuel Domínguez ao tempo que fai fincapé na importancia do asesoramento e á atención ao público. “No comercio estase a perder o tema da atención ao público. Aquí intentamos que todo cliente se vaia coa mellor percepción do noso negocio e quede satisfeito para que os que lle van á súa casa a comer e a cear queden sorprendidos”. En Bodegas Barral apostan polos produtores galegos. “Gústanos moito o tema dos queixos porque o queixo e o viño son moi afines. Traballamos, por exemplo, con Queixerías do Eume. Son produtos que non están en grandes superficies e que lle permiten esa exclusividade á xente”. Agora que se acerca o Día do Pai en Bodegas Barral contan con múltiples opcións para agasallar e sorprender. “Eu lle metería un par de botelliñas de viño, un queixo de Queixerías do Eume, un chourizo ou salchichón de Casa da Avoa, un par de patés e algo doce coma unhas galletas de Maruxas ou unha bica mantecada de Ourense para combinar ben o viño, o salgado e o doce”.

Na imaxe, Manuel Domínguez, propietario de Bodegas Barral.

Fotografía: Xarda.