En 1922, tamén en Tui, foron asasinados tres labregos por rebelarse contra o pago dos foros. Hoxe en día, un monumento en Guillarei honra a súa memoria. Lembramos os feitos:

O 27 de novembro de 1922, en Sobredo, xuntáronse 200 persoas da zona, acudindo á chamada das campás, para evitar un embargo decretado polo alcalde de Tui a un home que contaba cunha leira suxeita a foros. Ante a rebelión dos habitantes das parroquias de Tui, a Garda Civil acudiu para frear aos rebeldes. Ao chegar alí, comezou a disparar contra os labregos. O incidente deixou numerosos feridos e tres vítimas mortais: Cándida Rodríguez, Joaquín Estévez e Venancio González. Anos máis tarde, en 1932, tomouse a decisión de facer unha estatua en honra dos labregos mortos na revolta. O encargado desta tarefa foi Camilo Nogueira Martínez (autor doutras obras como o monumento ao emigrante da Praza de América de Vigo). Coa chegada do franquismo, a estatua foi dinamitada. Durante moitos anos, os mártires estiveron sen o seu monumento conmemorativo, ata que, en 1988, por iniciativa de entidades veciñais e culturais, se fixo unha reconstrución. Hoxe en día, o monumento aos Mártires de Sobredo é un dos máis atractivos de Tui a nivel cultural e, sobre todo, histórico. Porque a arte ten que axudarnos a non esquecer. 

César Bravo.