Máis de trinta estreas e vintecinco actuacións compoñen a programación do XX Festival de Cans. Vaise celebrar a semana que vén, do 16 ao 20 de maio, pero xa hai actividade previa esta fin de semana. Estrelas como a actriz Nathalie Poza, protagonista do filme “Honeymoon”, que abrirá o festival; do Premio de Honor Luis Zahera e outros como Javier Gutiérrez, María Vázquez, Diego Anido, Nerea Barros ou Tamar Novas daranse cita no festival. Dedicarase unha retrospectiva á directora franco-armenia Valérie Massadian, que viaxará a Cans para presentar parte da súa obra inédita en España. En total, nesta vixésima edición do festival proxectaranse cerca dun centenar de obras audiovisuais. No apartado musical, pasarán por Cans artistas como as Fillas de Casandra ou Tony Lomba e Elio dos Santos.