Durante a quenda de xullo son 40  as nenas e nenas que aprenden e xogan na Aldea de Verán de San Sadurniño,  mentres que para agosto xa hai 24 inscricións confirmadas. En moitos casos trátase de rapazada que repite experiencia, unha circunstancia que pon de manifesto a boa acollida que ten esta iniciativa entre as familias. No campamento socio-educativo promovido pola área municipal de Igualdade do Concello de San Sadurniño para favorecer a conciliación das familias durante as vacacións escolares. Ao longo das mañás, a rapazada combina xogos, deporte, obradoiros creativos e actividades ao aire libre nun programa que este ano ten como fío condutor o medio ambiente. A través del descobren a riqueza natural do municipio mentres traballan valores como a igualdade, a corresponsabilidade, a autonomía persoal e a xestión das emocións.