Ao día seguinte, despois da troula nocturna, os veciños e veciñas de Allariz representan, ataviados con traxes medievais, de xeito divertido, a procesión do Xan de Arzúa, dende a Praza do Eiró deica ao Campo da Barreira.

A partir do luns sucederanse numerosas carreiras do boi. O luns e o mércores serán os días dos nenos e nenas, nos que poderán gozar das súas propias carreiras e de xogos e inchables no Pavillón Municipal.

O xoves pola noite ten lugar a tradicional Cea no Campo da Barreira, onde os veciños e veciñas comparten unha agradable cea amenizada por gaiteiros.

Durante o venres, sábado e domingo a festa continúa cunha grande afluencia de público. A actividade máis salientable é o Maratón do Boi, que se celebra o domingo ás 19:30, carreira na que os catro bois percorren as rúas de Allariz.