Neste sentido e se "as instancias políticas, que son as que teñen que situarse" como sucede en Cataluña ou País Vasco, "non se sitúan", Alonso Montero manifestou que para facer o que cómpre que faga a Xunta en Galicia hai colectivos "como pode ser A Mesa" e a propia Real Academia Galega, que teñen que erguerse para defender a lingua galega. Segundo o presidente da Academia, Xunta debe emprender unha política lingüística, "apróbese ou non a reforma de Wert", que permita que os cidadáns teñan p galego "como lingua de instalación”.

As declaracións de Alonso Montero producíronse durante a presentación do proxecto conxunto da Real Academia Galega e o Parlamento de Galicia que preparan unha mostra, que podería chegar a ter carácter itinerante, sobre a historia do Día das Letras Galegas e sobre os 51 escritores homenaxeados no 17 de maio. A exposición terá como base as medallas, obra do debuxante Siro López e do escultor Manuel Ferreiro, de cada un dos escritores a quen se dedicou o 17 de Maio coas que conta a Cámara.