O suceso comezou cando o presidente da Xunta respondía a unha pregunta sobre a súa amizade co narcotraficante Marcial Dorado, do voceiro do BNG Francisco Jorquera, na sesión de control do goberno. Núñez Feijóo censurou ao representante do Bloque acusandoo de querer superar en radicalidade a Xosé Manuel Beiras. "Só lle falta a vostede sacar o zapato ou emocionarse ata chorar" indicou Núñez aludindo ao representante da Alternativa Galega de Esquerdas. Nese momento Beiras Torrado levantouse do seu escano e dirixiuse ao asento do presidente da Xunta reclamándolle decencia. Despois abandonou a sala por uns minutos de xeito voluntario.