O alcalde de Fene, Juventino Trigo, e a concelleira de Promoción Económica, Ángeles Coira, participaron esta mañá xunto cos representantes do CRD Agarimo, Luis Ángel Fraga; a Confraría Santiago Apóstol de Barallobre, Jorge López; e a Asociación de Comercio, Hostalería e Servizos de Fene “O Cruceiro”, Ana Basoa, na sinatura dos convenios de Subvencións Nominativas do 2023 destinadas ás entidades que desenvolven actividades de promoción económica.

Os tres convenios rubricados esta mañá ascenden a un total de 20.800 euros, repartidos do seguinte xeito: 2.800 euros ao CRD Agarimo pola organización do Encontro de “As Lavandeiras de Sillobre” (1.200 euros máis ca o ano anterior); 8.000 euros para o desenvolvemento de actividades durante este 2023 da Confraría Santiago Apóstol de Barallobre; e 10.000 euros para a Asociación de Comercio, Hostalería e Servizos de Fene “O Cruceiro”, destinados ao programa “Merca en Fene".

“Coa sinatura destes tres convenios reafirmamos o compromiso do goberno municipal de apostar por proxectos que teñen un interese especial para Fene, apoiando o desenvolvemento de actividades que xeran un retorno económico e contribúen á creación e fomento do emprego” destacou o rexedor fenés, Juventino Trigo.

Convenios coas entidades culturais e deportivas

Con anterioridade á sinatura que tivo lugar hoxe, o Concello de Fene asinou con representantes de varias sociedades culturais e deportivas os convenios de Subvencións Nominativas para o 2023, que ascenden a 50.000 euros, dos cales 38.500 euros corresponden ás entidades de carácter cultural, 6.500 euros ás ANPAs e 5.000 euros para as entidades deportivas.

O Concello de Fene tamén ten asinados convenios coas sociedades Felicia Asociación Cultural e AC Centolos, para o desenvolvemento dos festivais Felipop e Fenerock, por un importe de 11.000 euros cada un.