Tanto nos composteiros individuais como nos comunitarios, restos de cociña, café, vexetais, restos de poda e follas secas mistúranse para obter o compós. O obxectivo é non recorrer ao contedor verde para a materia orgánica, segundo a bióloga e técnica de ADEGA María Amigo. Os restos de poda e follas secas forman o material estruturante do compós. Hai que botar tanta cantidade dese material como de residuos orgánicos. O erro máis habitual nos composteiros individuais é non remexer, apunta a bióloga.  
"Temos que reciclar máis residuos. Tamén reducir e reutillizar. A Unión Europea obriga a reducir o volume de lixo e se non se cumpre haberá que pagar multas e iso vai repercutir nos petos de todo o mundo. Hai que cambiar o chip por iso e por compromiso co planeta que imos deixar a futuras xeneracións", afirma María Amigo. 
O Concello de Fene proxecta preparar tamén áreas de compostaxe comunitaria en Sillobre e San Valentín nun prazo estimado nun mes. Logo colocaranse este tipo de contedores tamén nas restantes parroquias para potenciar a reciclaxe e reducir o volume de lixo que se ten que levar a SOGAMA.