Un acto moi vistoso que conmemora en Fene o Día da Muller foi o despregamento dunha vistosa faixa de gancho inspirada na figura da mariscadora obra de Bruno Lopes que ilustra o mes de marzo no almanaque do Concello. 

“Concienciar”, é o que se pretende con esta labor artesanal explicou Pepa. “Unha forma de demostrar que facendo cousas sinxelas tamén se conseguen logros”, engadiu Mari Luz. “É moi colorista, como somos as mulleres”, apunta Marian. Carmen desvela que xa andan a traballar noutro proxecto, para o 25N. 

Dez creativas mulleres que se fan chamar Argalleiras do Gancho. Contaron co apoio dun home nesta labor feita expresamente para o 8M. O resultado é tan fermoso como o foi a árbore coa que agasallaron a todos os feneses o pasado Nadal. 

Sandra Permui agradeceu a súa implicación na reivindicación da igualdade, especialmente nun momento no que sufrimos un “rearme machista, sen medo, sen vergoña e cara adiante co feminismo e coa loita das mulleres”, manifestou a concelleira.