O proxecto, que inicialmente planeaba abrirse a toda a comarca por medo a non atopar participantes suficientes, rematou pechándose exclusivamente a nivel local ante a sorprendente cantidade de creadores que residen no municipio. "Démonos conta de que había moita xente que fai moitas cousas e que incluso nós o descoñeciamos; non sabiamos que o noso veciño facía ese tipo de artesanía".A feira contará cunha gran variedade de postos e disciplinas artísticas. As persoas que se acheguen ao Cantón poderán gozar de:

Artesanía téxtil, tanto pezas cosidas como tecidas.
Artes plásticas, con exposicións de pintura e debuxos a carboncillo.
Composicións florais con flores desecadas e esculturas orixinais feitas con macetas.
Presentación do libro "Oto o xigante comenubes" do grupo de teatro musical 2Plicas que completará a programación cultural da xornada a partir da unha do mediodía.

As organizadoras amósanse moi ilusionadas con este estreo e convidan a cidadanía a apoiar o comercio e a creación local nesta cita coa artesanía máis próxima. Para facer "a previa", o venres ás oito da tarde o actor Pepo Suevos contará contos na terraza do Honolulú, no peirao mugardés.

Imaxe de Laura e Álvaro na Libraría As lendas do gato

Fotografía Xan Xe