Nova edición do obradoiro dual de emprego Reinicia. Deu comezo este venres, día 15 de decembro, coa participación de vinte persoas desempregadas residentes en Fene, Mugardos e Ares. Son alumnas traballadoras do Reinicia X. Vanse formar para adquirir novas competencias que lles permitan atopar un emprego. Traballos de Carpintería e Moble e Aplicación de Vernices e lacas en elementos de carpintería e moble, que se imparte no Centro de formación do Concello de Fene, en Magalofes, e Atención socio sanitaria a persoas dependentes en institucións sociais, no Centro de Formación Francisco Vizoso, en Franza, Mugardos, son as especialidades nas que se formarán durante un ano.

Ademais, mulleres desempregadas de Fene, Narón, Neda, Cabanas, Ares, Mugardos, Cedeira e Valdoviño son as destinatarias do Programa Integrado para o Emprego de Galicia que acaba de ser autorizado. Incluirá accións formativas nas modalidades de limpeza industrial, peixaría, comercio, cociña, agricultura ecolóxica e community management. As participantes terán dereito a percibir unha bolsa de 10€ por día de asistencia ás accións do programa.  O Programa ten unha duración de doce meses.