O Banco da Diversidade de Fene é un proxecto que xunta inclusión, educación e economía circular.  O alumnado do Centro Ocupacional e dos ciclos formativos do IES colaboraron na creación dun banco elaborado a partir de plástico reciclado. A iniciativa terá continuidade o próximo curso coa colaboración do Concello de Fene para promover a educación ambiental nos centros escolares.

O Obradoiro de Precious Plastic de ASPANEPS encargouse da recollida, clasificación e trituración dos tapóns, así como do proceso de extrusión do material reciclado, obtendo finalmente os elementos que conforman o asento e o respaldo do banco. A participación do alumnado dos ciclos formativos do IES de Fene consistiu na fabricación da estrutura metálica e nos traballos de acabado e pintado, traballo que fixeron estudantes  do Ciclo Medio de Soldadura e Calderaría e do Ciclo Medio de Electromecánica de Vehículos Automóbiles. O resultado é un elemento urbano funcional, elaborado integramente a partir da colaboración entre entidades educativas e sociais do municipio que serve de exemplo práctico de economía circular e inclusión social.

A alcaldesa de Fene, Sandra Permui, destacou que “o Banco da Diversidade representa á perfección os valores que queremos impulsar como administración: a inclusión, a colaboración entre entidades, a formación práctica e o respecto polo medio ambiente”. A rexedora subliñou que “é especialmente valioso comprobar como un residuo pode transformarse nun recurso útil grazas ao traballo conxunto de persoas con capacidades e experiencias diversas”.