A romería do Camiñante volve as súas orixes e, no canto de celebrarse únicamente pola tarde como se viña facendo nos últimos anos, desta vez durará todo o día. Esta é unha das grandes novidades dunha festa á que este ano, dende a Liga de Amigos de Barallobre, queren imprimir un aire especial xa que se cumpren 75 anos dende a inauguración do Monumento ao Camiñante Descoñecido.

A romería será o vindeiro 4 de xullo e comezará pola mañá co tradicional pasarrúas dende a Liga de Amigos de Barallobre ate o Monumento ao Camiñante Descoñecido onde está previsto que se faga una ofrenda floral. De volta á Sociedade, celebrarase un festival folclórico e, ao remate, un xantar popular nunha carpa instalada a carón da entidade, que ademais servirá este ano para o reencontro dos Barallobre. En calquera caso a participación na comida é libre e aberta a tódalas persoas interesadas (previa inscripción na propia sociedade).

Para completar a xornada, a Liga de Amigos organizou para ese día pola tarde unha sesión de xogos populares e unha churrascada e, xa pola noite, un novo festival que abrirán, ao redor das dez, as cantareiras da Sociedade e no que actuarán tamén o grupo local “Estimaba que viñeras” e a gaiteira galega Cristina Pato.

A Liga de Amigos de Barallobre organiza os actos do 75 aniversario do Monumento ao Camiñante Descoñecido, en colaboración coa Concellería de Cultura de Fene e o Xacobeo.