Trátase dunhas protuberancias carnosas que se atopan na parte inferior da queixada, formadas por unha masa interna branca cunha envoltura gris moi xelatinosa. Un bocado moi prezado que se estima máis cando se trata das barbadelas da pescada do pincho, collida con azol ou no palangre para que non se mace.

As kokotxas prepáranse en salsa verde, salsa de allo, rebozadas e ao pil- pil, preparación na que o aceite e mais o allo vánse emulsionando meneando a cazola posta no lume morno ata lograr a salsa densa que invita a mollar o pan.

A primeira receita publicada da que se ten noticia, afirma Fausto Galdo, aparece no País Vasco aló polos anos 30. Outros peixes que teñen as barbadelas ben grandes son os bacallaus. Con elas faise unha boa empanada. Ten barbadelas tamén, aínda que menos finas, o peixe sapo. Neste caso soen fritirse na tixola pasándoas antes por fariña e ovo.

Imos cunha receita saborosa e non moi complexa:

Poñemos ao lume unha cazola cun vasiño de aceite. Cando estea quente bótanselle dous dentes de allo enteiros. Retiramos a pota do lume e colocamos as kokotxas co sal pertinente. Poñemos de novo a cazola no lume morno e movémolas sempre na mesma dirección ata que baixe o fervor. Repetimos os movementos continuamente para que as kokotxas vaian soltando a graxa ata que estean cocidas e o prebe se vexa branco e consistente. E bo proveito.

(Na imaxe, kokotxas de bacallau ao pil-pil)