Xosé Ramón Barreiro Fernández ofreceu unha nova ollada sobre a obra do mestre Feijoo tomando como referencia o legado deixado sobre o frade por dúas intelectuais como foron Concepción Arenal e Emilia Pardo Bazán. O profesor da universidade de Vigo Luis Rodríguez Ennes enriqueceu esa visión de conxunto do que Feijoo significou para a cultura galega, cun relatorio encamiñado a trazar a vixencia do seu pensamento no ámbito xurídico-social.

O programa completouse con dúas conferencias máis, unha a cargo de Inmaculada Urzainqui, profesora da Universidade de Oviedo e do Instituto Universitario Feijoo de Estudos do Século XVIII, que situou o seu legado nos inicios da historiografía da cultura. Pechou este seminario Antonio Lafuente cunha conferencia titulada “Unha segunda ilustración no século XXI”.