A idea de dedicarlle ao Camiñante descoñecido un monumento xurdiu no 1932. Foi do cronista do xornal “Pueblo Gallego” Alfonso Piñón que pedía coidar os camiños polos que todos pasamos en distintos momentos da vida, para aprender, buscar traballo, mentres agardamos polos seres queridos e mesmo na última viaxe, camiño do cemiterio.

A primeira pedra do monumento púxose en maio de 1934. No mes de xullo dese mesmo ano tivo lugar a inauguración. Asistiron personalidades como Otero Pedrayo ou Vilar Ponte. O monumento conta cunha pequena biblioteca e con doce bancos adicados a personaxes sobranceiras da cultura galega. Nun primeiro momento eran nove, cando estaba no emprazamento orixinal, na zona da estación de Barallobre ata que coa supresión do paso a nivel foi movido á actual localización en 1984.