Naufraxios como o do Santa Ana ou, máis preto da costa galega, os Bahía, Cordero, Siempre Casina, Hermanos Landrove, Santa Ana, Mar Noso ou Safrán, revelan a ausencia de control sobre os buques de pesca, denuncia CC OO. A maioría dos sinistros, por outra parte, afectan a barcos de recente botadura, con cascos de aceiro pero que, «inexplicablemente», sofren sinistros como afundimentos repentinos, choques contra mercantes dentro das rías ou incluso contra illotes.

Precisamente, contra un illote foi o choque que provocou o afundimento do Santa Ana, un buque que, coma moitos outros, posuía a bandeira dun país europeo —neste caso, a portuguesa—, pero operaba en portos do resto do continente —como os españois—. Por esta razón, o sector do Mar do sindicato considera que a Unión Europea tamén «debera ter algo que dicir» para evitar unha «impunidade que parece repetirse sinistro tras sinistro».