A Cabalgata estará formada por catro carrozas acompañadas pola Banda de Gaitas “Airiños de Fene”, a escola de baile “Paso a Paso” e o grupo de animación de “A Guagua”. Durante o percorrido, por razóns de seguridade viaria, non se tirarán caramelos. Serán as súas Maxestades e os seus axudantes quen os repartan en man entre os nenos e as nenas que se acheguen á recepción real que terá lugar ao remate da Cabalgata.

Xa na Praza do alcalde Ramón Souto, ademais do reparto de caramelos, as nenas e os nenos que aínda non formularan os seus desexos poderán depositar as súas cartas no Buzón Real situado na Praza, conversar e fotografarse coas súas Maxestades e participar nunha festa infantil na que non faltarán as coreografías e os xogos de animación.

A Cabalgata de Reis é un evento cargado de maxia que, porén, tamén leva aparellado un intenso traballo loxístico no que están implicadas as áreas de Cultura e de Seguridade, coa colaboración dun dispositivo especial de Protección Civil e da Policía local. 

As rúas do itinerario real (Marqués de Figueroa, cruzamento de Fene, Naturais de Fene) estarán cortadas ao tráfico mentres pase a comitiva e abriranse de novo inmediatamente despois. Ademais, a Avenida do Concello estará cortada ao tráfico e prohibido o aparcamento dende as 16:30h até o remate da festa infantil.

Na imaxe, os Reis Magos en Moeche (Fotografía César Galdo)