“Aposta por métodos autoritarios e represivos para enfrontar os conflitos; non vai acompañada nin de recursos, nin de medios para reforzar a autoridade do profesorado e ten como verdadeiro obxectivo dar o aval legal ás consultas a pais e nais para reducir a presenza do galego no sistema educativo”. Así resume CIG-Ensino os propósitos da Lei de Convivencia, un proxecto que cualifican de “alleo á realidade galega” porque foi “copiado” doutro semellante aprobado polo PP na Comunidade de Madrid”. 

O voceiro do sindicato, Anxo Louzao, desbota que haxa necesidade de regular unha suposta conflitividade nas aulas de Galicia que, en calquera caso, resulta de “baixa intensidade”, argumentou. Ademais, nega que o texto fomente a convivencia ou a participación cando “día a día se nega profesorado para facer substitucións” ou cando a redacción da norma “foi rexeitada tanto polo Consello Escolar de Galicia como pola maioría do profesorado”. 

Louzao asegura que se trata dunha lei trampa para contradicir o ditame do Consello Consultivo sobre o decreto do plurilingüismo. Criticou que, malia todo este rexeitamento, vaia ser aprobada polo PP “aplicando o rodillo da maioría absoluta”. Fronte a isto só cabe recurso do Parlamento autonómico no Tribunal Constitucional, algo que non vai acontecer “por razón obvias”, laiouse.