O abuso do teléfono móbil e agora tamén dos reloxos intelixentes, provoca un trastorno bautizado co nome de nomofobia. Un anglicismo que se refire ao comportamento de persoas que sofren ansiedade extrema se non teñen ao seu dispor o teléfono móbil. Falounos del esta semana o psicólogo José Barcia Tuccelli. Buscar e tocar continuamente o móbil, revisando se hai algo novo. “Que isto pase en situacións como conversas familiares, comidas conducindo ou no traballo”. Son sinais de alerta. Explica Barcia que “as persoas que padecen este tipo de trastornos levan o móbil cando van durmir, ata hai quen o mete debaixo da almofada”. Desactivar notificacións, silenciar grupos de whatsapp, desactivar aplicacións que non precisamos e deixar o teléfono antes de ir durmir son recomendacións de utilidade para que o móbil non invada toda a nosa vida.