“Se o galego é para as vacas, eu digo muu”. Frases coma esta ían impresas nas camisetas dalgúns dos asistentes á tradicional manifestación do 17 de maio. Unha mobilización na que estivo presente Radiofusión e que recolleu declaracións como as de Antón Reixa, un home polifacético que afirmou ser “un artesán do idioma galego” e que se expresou en contra de vivir no “territorio do mal humor” como pretenden algúns. Asegurou, igualmente, que non agardaba que a situación lingüística hoxe fose igual que a de hai 30 anos e que facendo producións en galego contribúese á defensa da nosa lingua.
Isto tamén o cre o actor Miguel de Lira, presente tamén na manifestación. Afirma que temos que ter presente o “to be or not to be porque facer cultura ou estar en Galicia é unha maneira de ser”. Asegurou tamén que os anuncios de Feijóo poden pasar de drama e converterse nunha desgracia, aínda que agarda que sexa “unha boa comedia que non quede en farsa”.
Con Miguel de Lira coincidía o editor Henrique Alvarellos para quen “defender o dereito a defender a nosa lingua, é algo máis que unha cuestión formal. É defender ser nós mesmos no mundo”.
A diferenza doutros anos e ante os cambios que no ensino anuncia a nova Xunta, desta volta a manifestación estivo encabezada por un grupo de nenos e nenas, xunto cos seus pais, que portaron unha pancarta co lema “Señor Feijóo, queremos xogar e aprender en galego”.
Tras eles, situáronse os membros da Comisión Permanente da Mesa pola Normalización Lingüística como Carlos Callón, Fran Rei, Iria Taibo e Susana Romero. Xa na Praza da Quintana cinco persoas encargáronse de ler o manifesto en defensa do galego: Avelino Pousa Antelo, Yolanda Castaño, Teresa Moure, Nemésio Barxa e Brais Fernández, un dos traballadores acosados por defender o uso do idioma na Capitanía Marítima de Burela.
Á hora de facer balance, Carlos Callón, contento polo multitudinario seguimento da manifestación, afirmou que “cómpre que o Goberno galego escoite”. Queren que “presidente e conselleiros se apropien do galego”, que o utilicen, porque vivir en galego non vai contra ninguén. Se Feijóo non reacciona, Callón anuncia que volverán á rúa.
Radiofusión realizou este mediodia un programa arredor do Dia das Letras Galegas entre as 11 e as 14,30, incluindo a retransmisión en directo da manifestación de Santiago de Compostela.
