O Concello de Fene someteuse a unha auditoría para formar parte deste proxecto da Unión Europea que acredita o seu labor a prol da igualdade. A alcaldesa recolleu o diploma que acredita o traballo do Concello nesta materia. “Valoramos sobre todo o compromiso coa igualdade, o Concello asume agora uns compromisos por dous anos”, explicou o representante da entidade que avaliou as políticas de igualdade da administración municipal de Fene. O recoñecemento forma parte dun proxecto da Unión Europea. Distingue aos municipios que apostan pola igualdade, en Galicia hai 14 certificados concedidos ou en proceso. Sandra Permui destacou que desde o Concello se traballa para avanzar na igualdade desde todos os departamentos. Eloxiou o traballo da coordinadora da área de Benestar e Igualdade e mostrou o seu orgullo polo recoñecemento, pero recoñeceu que en materia de igualdade queda moito por facer. “O camiño non está nin comezado, vanse dando pasos moi pequenos”.