O segredo para que todo saia ben nun evento da magnitude da Semana Santa Ferrolana está na “implicación desinteresada” dos organizadores e de tódalas persoas que participan, ano tras ano, na celebración da Paixón de Cristo. Son palabras da presidenta da Coordenadora de Cofradías de Ferrol. Meca Arcos asegurou esta mañá a Radiofusión que todo marcha segundo o previsto e que nestes momentos xa está case todo listo para o arranque da Semana Santa. Nos días que restan, as cofradías apuran os últimos preparativos, dende o amaño de tronos e imaxes ate os ensaios para coordenar os pasos dos costaleiros. Por parte da Coordenadora, segundo explicou a súa responsable, mantívose unha reunión esta semana coa Concellería de Tráfico para organizar o paso dos distintos desfiles polo centro da cidade. Neste senso, Meca Arcos loubou o esforzo do Concello de Ferrol por mellorar o estado das rúas perante a celebración da Semana Santa. 

Poucas novidades no programa da Semana Santa Ferrolana deste ano. A Cofradía de Dores estrea unha nova imaxe, a da Virxe da Amargura, pero, polo demais,  serán as mesmas procesións, os mesmos tronos e as mesmas imaxes doutros anos.  En total haberá 25 desfiles, dende o Domingo de Ramos ate o Domingo de Resurrección, coas dúas xornadas centrais de Xoves e Venres Santo. ´

A Coordenadora de Cofradías volveu contar este ano coa colaboración do Concello de Ferrol, que aportou 70 mil euros para a organización do evento. Meca Arcos recoñeceu que a crise económica tamén se deixou sentir nos preparativos desta Semana Santa no senso de que se perderon algúns convenios con certas entidades financieira. De tódolos xeitos, afirmou que as cofradías están a suplir esta merma económica coa entrega e adicación da xente.