Este ano o Festival Atlántico contará con algunhas dos narradores máis importantes do mundo en lingua castelá. Deste xeito, a amazónica Cucha del Águila (Perú) traerá o seu traballo comprometido coas mulleres da selva e a ameazada ecoloxía do bosque ecuatorial. A colombiana Carolina Rueda, considerada unha das mellores contadoras do mundo pola crítica e os profesionais, amosará o seu amplo repertorio e o cubano Aldo Méndez dará conta da fusión entre a palabra e as outras grandes artes.

Xunto a estes tres narradores latinoamericanos, Atlántica 2016 prestará atención este ano a Portugal a partir da presenza de Vítor Fernándes (Tras-os-montes), Ana Sofia Paiva (Lisboa) e Valter Peres (Azores), do resto do Estado, como Marián Colina (Madrid) e unha ampla presenza galega, encabezada por Quico Cadaval e que conta con Caxoto, Celso Fernández Sanmartín, Paula Carballeira, Ángeles Goás, Avelino González, Fátima Iglesia Villamel, Cándido Pazó, Charo Pita, Raquel Queizás, Vero Rilo e Gema Santos.

Rapazada

Un dos aspectos máis destacados do festival é a participación, neste ano, de máis de 2000 nenos a través dun denso programa de visitas escolares, institutos e centros de educación que se beneficiarán e aproveitarán dunha programación pensada para eles, pensada na interculturalidade e no encontro entre razas, ideas e territorios. Varios colexios de Compostela participan neste programa. Os nenos disfrutarán, ademais, dun Maratón de Contos para eles, o domingo 13 ás 17:00 na Nave de Vidán.

Rede

O evento tamén servirá para formalizar a Rede de Festivais do Atlántico, unha iniciativa para coordinar os festivais de narración oral de Galicia, Lisboa, Azores e Madeira a través da xuntanza de xestores e técnicos culturais destes diferentes territorios e iniciar accións e eventos conxuntos. Ademais, concederase a Corna de Honra ao Maratón de Contos de Guadalaxara, no seu 25º aniversario, por ser un dos principais encontros de narración oral da Península Ibérica.

O Festival Atlántica de Narración Oral está dirixido pola actriz Soledad Felloza e conta coa participación na organización dun importante conxunto de profesionais da narración e activistas culturais que loitan desinteresadamente porque Santiago de Compostela poida converterse nun referente da narración oral en Europa.

Pódese consultar todo o programa en festivalatlantica.com ou en facebook.com/festivalatlantica.