“O que máis choca desta decisión é que se tome ao tempo que coñecemos que os Concellos de Bilbo e de Xixón, que multiplican por 5 e por 3, respectivamente, o orzamento do Concello de Santiago, e que levaban tempo traballando neste tema, decidisen finalmente, moi ao seu pesar, non presentar a súa candidatura en base a un acto de responsabilidade institucional”, explicou o concelleiro.

Bilbo descartou presentar candidatura para acoller esta semifinal da Copa Davis “por responsabilidade institucional e polo elevado custe desta eliminatoria”, segundo palabras textuais do concelleiro de Deportes desa cidade, quen afirmou que "hai organizacións deportivas que tocan o ceo e estes son tempos de ir a ras de chan".

Así, o portavoz municipal nacionalista destacou que “só o canon que hai que pagar supón 800.000 euros, ao que hai que engadir os custos da grada para 16.000 persoas e o resto de gastos de montaxe e intendencia que poden chegar a dobrar esta cifra, a expensas do que se recupere pola venda de entradas”.

O Concello de Xixón cifraba a cantidade que precisarían investir para desenvolver esta actividade nun mínimo de 2 millóns de euros e renunciou, a pesar de que xa tiña 600.000 euros comprometidos en patrocinadores, tanto por motivos económicos e pola premura de tempo.

“Santiago pode ser un escenario ideal para grandes acontecementos deportivos e o BNG non negará a repercusión mediática que pode ter un evento deste tipo, pero primeiro hai que cubrir as necesidades básicas dos pequenos clubes, dos clubes profesionais e das instalacións deportivas da nosa cidade”, sinalou Rubén Cela.

O portavoz municipal engadiu, ademais, que “as súas primeiras declaracións do concelleiro de Deportes, Adrián Varela, eran para apostar polo deporte base, mais a realidade é outra ben distinta; á vez que se anuncia a intención de acoller a semifinal da Copa Davis, pode barallar a posibilidade de reducir ou de suprimir as achegas á Fundación Compostela Deporte, aos clubes deportivos e ao deporte base da cidade”.