Quen xa se manifestou, tal e como llo requiría onte o Partido Socialista, foi o presidente provincial do PP de Pontevedra, Rafael Louzán. Fíxoo para reprobar as mensaxes anónimas e ameazantes contra a candidata do PsdeG á Alcaldía no municipio de Covelo, Rebeca Costas. O tamén titular da Deputación condenou ese tipo de ataques a un representante público, pero tentou desmarcalos da loita partidaria, afirmando que hai cargos do seu partido noutros puntos da provincia que tamén padeceron mensaxes ameazantes e non por iso aludiron a grupos opositores. Louzán coida que os socialistas tentan implicar ao PP nesas cuestións como último recurso perante a perspectiva dun mal resultado electoral nos comicios locais.