O taekwondista vilalbés, pertencente ao club Moo Duk Kwan, dirixido por Antonio Montes, conseguiu a prata despois de gañar tres combates antes de pasar á final, vencendo nos previos ao campión galego. David Ansede participou neste torneo xunto con Janice López Castelo, que loitou en menos de 37 quilos, pero que non pasou do primeiro combate.

O Open de Arrigorriaga dispútase na localidade vasca do mesmo nome e é o campionato cadete mais importante que se celebra en España, á marxe do propio Nacional da categoría. O obxectivo principal da participación dos dous loitadores foi a de adquirir experiencia nun evento deportivo de importancia, ademais de coller puntos para que Janice López poida asistir ao campionato de España, segundo se admitiu desde o club chairego.