A fin de contas, que sabemos de Eslovaquia. Se eu fose finalista dun concurso de Míster e me preguntase o embaixador eslovaco o xa clásico “que sabes do meu país?”, coido que como aquela pobre rapaza que resumiu nunha frase a non breve historia de Rusia, acabaría dicindo o de “pois é un país de xente marabillosa” e pouco máis. Sabería dicir que formaba parte de Checoslovaquia, tiven que mirar na Wikipedia para lembrar que a capital é Bratislava, e pensaba que teñen gran tradición baloncestística ata que me din conta de que confundía Eslovaquia con Eslovenia. O que non diría nunca e que teñen cinematografía de seu, e resulta que si, e que mesmo a podemos ver esta noite en La 2.

“De fosa en fosa”, conta a programación que é unha película de orixe eslovaca rodada en 2005. Pedro, un home de 30 anos da Eslovaquia rural escribe e pronuncia discursos funerarios para os enterramentos da súa cidade. Vive coa súa familia, o seu pai que tenta suicidarse unha e outra vez, malia que sempre erra no seu propósito, e dúas irmás: Ida, xordomuda e solitaria, e Vilma, atarefada coidadora do seu fillo e do resto da familia. Din que é un bo filme, pero o que para min resulta de seguro é exótica e por iso xa paga a pena vela. “De fosa en fosa” pásana ás dez da noite en La 2.