Os examinadores sospeitaron que un aspirante de nacionalidade paquistaní podería estar valéndose de medios técnicos non autorizados durante a realización das probas teóricas no centro de exames de Ferrolterra, o pasado día 5 de xullo. Solicitaron por iso a colaboración dos gardas de Tráfico para realizar as comprobacións de identidade e detección de posibles infraccións durante as probas. Os axentes descubriron que o aspirante utilizaba dous dispositivos de telefonía móbil conectados a unha cámara de captación de vídeo e audio ocultos baixo a roupa, así como un pequeno auricular inalámbrico inserido no conduto auditivo. Segundo aclara a Garda Civil, a Lei de Tráfico tipifica como infracción moi grave o uso destes dispositivos. Estipula tamén que o aspirante non poderá presentarse ás probas para a obtención ou recuperación do permiso ou licenza de condución no prazo de seis meses.