“A min o disco gústame”, di Luís, que é un dos pais da criatura pero sabe moito de música. Los Huéspedes Felices son Ramón Saleta, Martín López, Óscar Antón, Daniel Blanco, Luís Iñíguez e Alvaro Calvo. Rock, pop, psicodelia, folk nun disco que foi madurado. “Temos a vantaxe de que temos todo o tempo do mundo, a facilidade de dedicarlle moito tempo ás cancións, cando as cousas se fan con repouso sempre saen mellor”, explica Luís. “Vender discos é unha cousa bastante difícil porque hai demasiada oferta, levantas unha pedra e saen cinco grupos e de distintos xéneros”. Coma sempre pasa, iso ten vantaxes e inconvenientes.“Hoxe socializouse moito, todo o mundo ten acceso ás tecnoloxías, podes gravar na túa casa, hai moita oferta e pouca demanda”.