Trátase dun conxunto poético a modo de roteiro por algúns dos elementos significativos da cultura galega contemporánea. Seguindo cada unha das letras do alfabeto, como inicial da palabra que conforma o centro temático, cántanse dende as bateas aos eucaliptos, dende as uvas ás hélices dos aeroxeradores, dende o zoco á moda, dende o Xurés ao hóckey a patíns. Todos os suxeitos do poema teñen en común unha dimensión autoafirmadora que trascende a Galiza e a sitúa no mundo:como produtora de kiwi ou da metade do mexillón mundial, coas tradicións do San Xoán ou a universalidade do Camiño de Santiago, cun concurso hípico entre os mellores de Europa ou co campionato do mundo de hóckey... sen esquecer a Rosalía de Castro ou a lingua galega. Dende un xogo formal moi rítmico, a variedade temática e a pluralidade estilística conforman un poemario orixinal e ameno.