ACTUALIDADE
-
Novas
Novas sobre programas, emisoras,... Todo o mais actual e de interese nesta sección.
-
Radio á carta
Escoita online os podcasts dos teus programas favoritos de Radiofusion.
Praza Alcalde Ramón Souto s/n, 15500 Fene (A Coruña) Galicia - Tfno. 981 492 773 - noticias@radiofusion.eu
Facebook
Twitter
O colexio Jorge Juan de Fene e o IES Terra de Trasancos, de Narón, resultaron seleccionados entre 54 centros de ensino de Galicia para participar nas probas do informe PISA 2009, centrado na comprensión lectora.
O mencionado programa é un estudo comparativo, internacional e periódico que avalía o rendemento do alumnado de 15 anos ao finalizar a etapa escolar obrigatoria, avaliando competencias consideradas clave, como a lectora, a matemática e a científica.
Unha das novidades do certame é que este ano a Organización para a Cooperación e o Desenvolvemento Económico (OCDE) medirá a capacidade lectora do alumnado en formatos electrónicos. No caso dos centros da comarca, o colexio fenés Jorge Juan participará “vía papel”, mentres que o instituto naronés Terra de Trasancos o fará “vía internet”.
O estudo realízase cada tres anos, analizando en cada aplicación os rendementos do alumnado nas competencias básicas de lectura, matemáticas e ciencias, recibindo unha delas, de forma rotatoria, unha consideración principal. O informe proporcionará datos e indicadores comparativos dos distintos sistemas educativos dos países participantes, que este ano son un total de 65 e dos que 30 son membros da OCDE e 35 de países asociados.
O programa PISA conta para o tratamento técnico cun consorcio internacional de institucións de investigación educativa e a participación de España, na súa mostra estatal e ampliada por varias comunidades autónomas, está coordinada polo Instituto de Avaliación, órgano integrado dentro do Ministerio de Educación.