“Estudar os nomes dos lugares é unha maneira marabillosa de achegarnos a como era o territorio, fálanos das especies vexetais que había, das especies de animais, dos tipos de cultivos, é unha das grandes riquezas da nosa toponimia, a gran variedade de temas que toca”, manifestou Vicente Feijoo.

En Galicia calcúlase que houbo moitos máis de dous millóns de nomes de lugares. “Estanse perdendo e nas últimas décadas de forma acelerada co despoboamento”, sinala o lingüista. Son moitos, variados e adoitan ser descritivos. Para que non se perda esa gran riqueza do noso patrimonio cultural funciona a aplicación colaborativa Galicia Nomeada coa que calquera pode colaborar no rexistro de microtopónimos. De momento, teñen recollidos máis de medio millón e cren que poden chegar a salvagardar ao redor de dous millóns.

Valdoviño, Narón, Mugardos e Ares son os catro concellos da comarca  que teñen menos nomes de lugares recollidos na plataforma creada para garantir a súa preservación. Na comarca tamén hai poucos de Narón, Mugardos e Ares. Na Casa da Cultura de Valdoviño van explicarlle esta tarde á veciñanza como funciona a aplicación. Tamén se falará da orixe e o significado dunha escolma de nomes de lugar de Valdoviño. Actos semellantes celebraranse proximamente noutros lugares de Galicia. Apelando á colaboración cidadá antes de que se perdan os microtopónimos.