Despois de tomarnos o tempo xusto e necesario para dixerir Ao sur da liberdade, a primeira entrega da triloxía sobre a estirpe do galego Banu Marwán, chéganos a segunda parte da serie elaborada por Xosé Henrique Costas baixo o título Entre a vontade e o destino. Nesta segunda entrega, mergullámonos nunha sociedade conflitiva na que abondan as tensións das diversas faccións sociais, políticas, étnicas e relixiosas. Vemos como estas condicionan a vida das persoas e personaxes que desfilan por este relato histórico dun clan galego nunha época tan remota como convulsa.  Ao final desta segunda entrega, igual ca na primeira, aparece un índice toponímico, outro onomástico e un glosario de arcaísmos, arabismos, dialectalismos e voces de uso pouco común.