A Consellería do Mar impulsará o consumo dos produtos pesqueiros de Galicia na feira Expomar que se celebrará en Burela do 19 ao 22 de maio. O departamento que dirixe Rosa Quintana estará presente neste evento especializado cun stand de 100m2 no que se amosarán diversas campañas promocionais desenvolvidas pola Consellería e se degustarán produtos do mar de Galicia como bonito, mexillón, conservas e rodaballo. Así o explicou hoxe Rosa Quintana en Santiago durante a presentación da XIV edición desta feira bienal.
Rosa Quintana salientou que Expomar “é un evento consolidado e un referente internacional para os profesionais do sector mariño” e que falar deste certame é “falar da Mariña lucense e de Galicia como punto de encontro do sector pesqueiro aberto ao mundo”. Neste sentido destacou que funciona como plataforma de comunicación e “intercambio de ideas” entre a Administración, os empresarios do sector mariño e os profesionais que traballan nel. Ademais a conselleira recoñeceu a importancia deste certame no impulso á comercialización dos produtos do mar, tanto frescos como en conserva e elaborados.
Esta edición de Expomar contará con arredor de 100 expositores do sector náutico-pesqueiro e 350 marcas. Neles mostraranse produtos relativos a diferentes eidos do sector como cámara de máquinas, equipos de cuberta, casco e carga, electricidade naval, equipamentos de proceso e conservación en buques. Durante a súa intervención, a titular de Mar agradeceu á fundación Expomar o seu labor “de concienciación sobre o mundo do mar” e na organización deste evento de difusión do sector náutico-pesqueiro.
Xornadas técnicas e Encontro empresarial
Como complemento á feira de carácter divulgativo e teórico, nacen as Xornadas técnicas e o Encontro empresarial que, co paso do tempo, adquiriron personalidade propia e diferenciada dentro do programa do evento. Ambas iniciativas celébranse anualmente e actúan de foro de debate no que se dan cita tódalas administracións e técnicos especialistas do sector.
Nas xornadas debátense os temas de maior actualidade e relevancia no eido pesqueiro. Nas deste ano versarán sobre a comercialización no sector pesqueiro, a implicación e as influencias da normativa comunitaria e internacional na actividade pesqueira. Por outra banda, o encontro empresarial, que reúne a entidades e a asociacións representativas da frota galega, celebrarase o 20 de maio e nel tamén se tratan cuestións de relevancia para o sector.
