“Sogama segue queimando, iso penalízase e os concellos e veciños somos os que sufrimos as consecuencias”, explicou Juventino Trigo. Fene, igual que o resto de concellos galegos aos que dá servizo Sogama, paga a penalización dun modelo no que a Xunta optou pola incineración dos residuos. Sogama incumpre as directivas europeas que promoven a reciclaxe e pásalle a factura da penalización aos concellos. En xaneiro de 2025 a empresa participada pola Xunta cobrará aos concellos 108 euros por tonelada de residuo, cando un ano antes eran 66 euros. Os concellos teñen que repercutir o custo do servizo á cidadanía porque a lei prohibe que os servizos municipais sexan deficitarios. En Fene prevese unha suba inicial da taxa que se achega ao 45%. "Estamos por debaixo do que teríamos que subir", advirte o alcalde. 

Trigo deu conta tamén da sinatura, este luns, dun convenio coa Deputación da Coruña para avanzar na dixitalización da xestión municipal. Un acordo coa Deputación que permitirá maior axilidade na tramitación administrativa, ademais de facilitar o cumprimento das obrigacións de transparencia e mellora da seguridade.