“Ter unha mesa de negociación sería unha cousa magnífica, o ano pasado reunímonos de forma regular, en decembro solicitamos un calendario de reunións para este ano e aínda non temos resposta”, di o presidente das editoras. Citando a Manuel Bragado, apunta Miguel Toval que o do libro “é un sector cunha mala saúde de ferro, un sector resistente pero con moitas debilidades”. Cada vez menos xente fala en galego e iso repercute negativamente na venda de libros en galegos. A literatura galega ten éxito, recibe premios e tradúcese a outras linguas, pero a venda de libros en galego diminúe. De cada 100 libros vendidos só 6 están escritos e publicados en lingua galega, explicou Miguel Toval. Na undécima gala dos Premios Follas Novas, que conceden a Asociación de Escritoras e Escritores en Lingua Galega, a Asociación Galega de Editoras e a Federación de Librarías de Galicia, o sector reclamou unha visibilidade acorde co talento e os éxitos que está colectando a literatura galega.