Penas Patinho, coautor da Guía das aves de Galicia, tivo noticia da existencia da pega branca de Fene polas imaxes que rexistrou o fotógrafo de natureza Xosé Bieito Arias. Di que é un caso insólito so ata certo punto. Lembra ao merlo branco que apareceu en Dodro en 2020 ou o famoso Copito de neve, o gorila albino que viviu no zoo de Barcelona. Son casos raros, pero non únicos que se orixinan pola mutación dunha enzima necesaria para que a melanina chegue ás plumas ou ao pelo do animal. 

Á pega branca de Fene sería interesante facerlle seguimento para comprobar se transmite esa mutación á descendencia. O malo é que a característica que a fai especial tamén a converte en vítima fácil dos depredadores. “Pódese ser guapo pero ata certo punto nada máis”, bromea o profesor Pena Patinho. Por se fora pouco, os paxaros e o resto dos animais, coma ás persoas, non son precisamente tolerantes cos diferentes. “Incluso moitas veces os exemplares da propia especie rexéitanos, non os consideran normais”, explica o experto.