Tiña 19 anos e morreu no hospital da Coruña onte domingo debido a unha intoxicación por inhalación de fume. A muller de 24 anos e o seu fillo de tres continúan hospitalizados, igual que o bombeiro ferido ao que tiveron que amputarlle unha perna. A muller do empregado municipal denunciou nun escrito a falta de medios do corpo de extinción de incendios. Lembra que  naquela noite de temporal o parque ferrolán operaba con só tres bombeiros para atender máis de 16 intervencións, moito menos, di, «que os asesores que acompañan ao alcalde a cada acto». Sostén que traballar con tan pouco persoal «deixa aos afectados e aos traballadores abandonados á súa sorte».  Os compañeiros do bombeiro ferido preparan unha concentración de apoio a este profesional. Será o xoves, ás seis da tarde na Praza de Armas. 
O alcalde de Ferrol sinalou que a policía nacional ten en marcha dúas investigacións, unha polo incendio e outra polo accidente laboral do bombeiro. "Esperamos que conclúan canto antes. Queremos saber as causas dos dous sucesos", afirmou o alcalde, quen asegura que comparte a dor dos seus compañeiros e da familia. ,
O incendio acaeceu o pasado xoves na rúa Alvarez de Sotomayor do barrio de Recimil. O lume orixinouse nun radiador da vivenda afectada. Os bombeiros acudiron ao lugar con tres efectivos e reiteran as súas demandas de máis medios. Ao alcalde pídenlle, ou que peche o parque ou que non se fagan saídas tan perigosas con tan pouca xente.