Vacacións en Paz é unha veterana iniciativa solidaria que facilita a nenas e nenos saharauís escapar das altas temperaturas do deserto durante o verán. Nese tempo tamén pasan revisións médicas e coñecen a vida fóra dos campamentos do deserto.   O Concello de Fene colabora coa Asociación Galega de Solidariedade co Pobo Saharauí neste programa.

O concelleiro de Benestar, Manuel Polo, apelou á solidariedade das familias de Fene para que acollan este verán, durante dous meses, a menores saharauís. A delegada da entidade, Maite Martínez, denunciou o recorte do 40% das axudas humanitarias. Nos campos de refuxiados, no medio do deserto, non hai recursos e as máis de 200.000 persoas que alí viven non teñen máis medios de vida que as axudas humanitarias e os cartos que mandan ás súas familias algunhas persoas emigradas.