“As familias son modelos. Se as persoas adultas non se coidan ou non se valoran mal poden estar inculcando iso aos nenos e nenas”, di a pedagoga do Concello de Fene, María Xosé Paz. Os coidados, a xestión do estres, o auto-coidado e a auto-estima son temas que se tratarán no vindeiro Círculo de Diálogo.

O corte xeralizado da luz impediu celebrar esta interesante sesión que foi adiada ata o luns 12 de maio, ás seis e media da tarde, na Casa da Cultura de Fene. Ata este venres poden apuntarse as familias que precisen o servizo de conciliación. A pedagoga do Concello de Fene, María Xosé Paz, destacou que esta formación para as familias tamén é de interese para avós e avoas que están moi pendentes da educación das crianzas e observan, ademais, que actualmente hai unha maior implicación dos pais.