Fene reivindicou a cultura, a memoria e o compromiso colectivo no acto institucional do Día da Patria Galega celebrado onte á tarde no Parque Lineal do Río Cádavo. A alcaldesa, Sandra Permui, destacou que “a patria constrúese cada día a través da lingua, da cultura, da defensa dos servizos públicos e da igualdade”.

O creador e activista cultural Paco Oti foi o encargado da declaración institucional, cun chamamento á paz, á defensa da identidade galega e ao papel da cultura como ferramenta de construción colectiva. A Paco Oti resultoulle moi emotivo un acto no que participaron membros da Corporación municipal, encabezados pola alcaldesa, Sandra Permui, e que lle permitiu reunirse con vellos amigos. O acto rematou cun aplauso colectivo. Para pechar a celebración celebrouse un concerto na praza do Alcalde Souto coas actuacións da Orquestra Bravú Xangai e Loita Amada.